Dr Afrika Bambaata (* 10. April 1957, z New York City als Lance Kahyan Aasim)[1][2] isch en HipHop-Pionier und dr Gründer vo der Zulu Nation. Si Stück Planet Rock us em Joor 1982 isch der erschti Electro Funk-Track gsi und hed der HipHop in e neui Richtig brocht.
In Medie wird zmeischt Kevin Donovan als sii ächte Name aagää, aber är het in verschidene Interview gsait, dass das e ander Miglid vo sire früenere Gang „Black Spades“ gsi seig.
Em Afrika Bambaataa sy Name isch vo merere andere Musiker entleent worde: em Afrika Islam – Son of Bambaataa, em Afrika Baby Bam vo de Jungle Brothers und em WestBam. Dr Afrika Bambaataa hed unter anderem mit em James Brown, UB40, em Yellowman und em Johnny Rotten zämegschafft. Zäme mit em italiänische Broduzänte-Team De Point hed är au HipHouse-Stügg uffgnoo. Mitte 1990er Joor het är sich mee in Richtig HipHop entwiggled; ändi 1990er Joor het är sich wider uf syni Electro-Wurzle besinnt und schliesslig mit em Westbam und em Gary Numan zämgeschafft.